Vienan Karjala

Kirjutukset vienankarjalakse

Šuojamaskija tulou riittäväšti

Kalevaletalo-etnokulttuurikeškukšen ruataja Jelena Kartunen šuojamaskija ompelomašša. // Kuva: Alevtina Lesonen

Vielä kuukauši takaperin monikertasie ta yksikertasie maskija šai oštua kaikista aptekkiloista. Nyt tätä tavarua ei ole kuin kaupunkien, niin ni kylien aptekkiloissa. Tietyšti, maskija voit oštua internetistä, še on niise hyvä vaihtoehto. Voit ommella iče tahi löytyä šemmosen ihmisen, kumpani myöy šiula pari maskie. Ka šuojamaskien hinnat jo ollah hyvin korkiet, varšinki kyläläisillä.

Kalevalan piirihallinnon piällikön Valentina Bulavtsevan käšyn mukah kevätkuun 27. päiväštä alkuan Kalevaletalo-etnokulttuurikeškukšen, keškikoulun, Lapšien monitoimitalon ta Kulttuuritalon ruatajat ruvettih ompelomah monikertasie šuojamaskija.

Maskija varoin oššettih materialija – rihmoja, kankašta, kuminauhoja – 42 tuhanteh ruplʼah. Kaikkieštah pitäy ommella 4000 tuhatta šuojamaskie. Voit olla, jotta täh työh liitytäh yläluokkien opaštujat ta volontʼorit.

Maskija ommellah valtijon standarttien mukah, ne ollah kakšikerrokšiset. Valmehie maskija alettih myyvvä 30. kevätkuuta Kalevaletalo-etnokulttuurikeškukšešša. Oštaja makšau vain materialiloista. Šuojamaskija ruvetah myömäh šini, kuni tällä tavaralla on kyšyntä.

Jokahisella ihmisellä pitäy olla kolme monikertaista šuojamaskie. Niitä pitäy vaihtua joka kakši tuntie. Käytettyjä maskija enšin pitäy peššä, kuivata ta šiitä hyväsisti šilittyä. Vain šen jälkeh šuojamaskie voit käyttyä uuvveštah. Koista lähtiessä, esimerkiksi, kauppah tahi aptekkih, maskin lisäkši pitäy panna piällä vielä i šormikkahat ta šuojalasit. Näitä šiäntöjä on pakko piteliytyö.

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat