Vienan Karjala

Kirjutukset vienankarjalakse

Karjalazet

Galina Fedulova, Tamara Boikova da Tatjana Romanova (hurualpäi oigiele) Anuksen kanzallizes kirjastos. // Kuva: Ol'ga Smotrova

Täl kerdua “Oman Muan” paginkanzoinnu ollah meijän abuniekat: Anuksen kirjaston kanzallizen da kodirannan literatuuran ozaston endine ruadai Tamara Boikova da nygözet ruadajat Galina Fedulova da Tatjana Romanova. 
Anuksen kirjastos ollah ruokos kai “Oman Muan” noumerat, sen ruadajat kerras voijah mustoittua, kudai kirjutus kudual vuvvel da kuul oli painettu. 
Tänävuon Anuksen kirjasto on täyttänyh 159 vuottu, sen Kanzalline ozasto rubei ruadamah 1. sulakuudu 1993. Ozasto luajittih Karjalazien I Kerähmön jälles, kudai piettih vuvvennu 1991 Anuksen mual. 
– Minä vie deleguatannu olin sit Kerähmös. Kerähmö proidi, tuli meile kirjastoh L’oša Osipov, sanou, la Kerähmö meni, karjalazet, ollougo teil lugiettavua karjalan kielel. A minä Kerähmös ostin Grigorii Makarovan sanakniigan, annoin sen hänele lugiettavakse. Sit karjalazet ruvettih tundemah omua iččie karjalazinnu, nouzi omaničentundo, ruvettih kyzymäh lugiettavua karjalazien elaijas da perindölöis. Silloi kirjaston johtai Nina Jagubova piätti luadie kirjastoh Kanzalline ozasto. Ozaston azuttuu kirjastoh kerras rubei tulemah Oma Mua -lehti. 
– Rahvas ei tietty lehteh nähte, ga konzu lehti rubei tulemah, hyvin ruvettih lugemah. Riipuškalan kylän eläi Aleksandra Ivanovna Sorokina on lehten enzimäzii lugijoi, tässäh lugou lehtie, hänel on 87 vuottu. Vikse kaksikymmen vuottu jo lugou, ku löydänöy lehtes midägi mieldykiinnittäjiä, sit kerras soitaldau: “Galina Mihailovna, kačo, midä luvin, minä händy tunnen…” Hänel on hyvät juuret. Meijän Grigorii Makaroval onhäi Karjalan kielen näyttehet -kniigu, i sit kniigas on Aleksandra Ivanovnan tuatas Ivan Nikiforovas kirjutettuloi paginoi, sanelou Galina Fedulova. – Zoja Bogdanova ainos tulou lugemah, mielihyväl lugietah lehtie L’ubov’ Kunil’skaja, Nadežda Artemjeva, Valentina Petraš da L’udmila Romanovskaja da muut, moločat ollah. 
“Oman Muan” kirjutuksii Tamara Boikova da Galina Fedulova ainos käytettih, konzu piettih vastavuksii omamualazienke kirjastos. Tiettäväine, ei vaiku lehtie käytetty, ga se oli da tässähgi on suurennu abuniekannu. Enziallus kiännyttihgi Kanzallizeh arhiivah, kus skaniiruittih harvinazii dokumentoi, dai Kielen, literatuuran da histourien instituuttah. 
Galina Mihailovna iče äijän tiedäy karjalazien eloksentavois, maltau sanelta, maltau auttua virtytykses da ajamizes... 

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat