Vienan Karjala

Kirjutukset vienankarjalakse

Karjalazet puututah ARTE TV:h

Karjalan Kielen Koin kielipezän ruado puuttuu kinoh vältämättäh. // Kuva: Gleb Jarovoi

Jevroupas suahah nähtä kui da midä, karjalazet, elämmö. Pitky kino rodieu valmis jo sulakuul. Myö näemmö kinon internetas.

 

Tuhukuun jälgimäizen nedälin aigah Karjalan suvipuolel oldih käymäs žuralistat Germuaniespäi. ARTE TV on tundiettu kogo Jevroupas kul’uurukanualu, kudai viestittäy nemčoin da frantsien kielel. Se on valdivolline, puolet aktsielois kuulutah Germuanien valdivole da toizet puolet – Frantsiele. Ven’a lujah vedäy mieldy ulgomualazil tv-miehil.

Kielivähembistön, karjalan rahvahan elaigu Karjalas rodieu pohjannu 43-minuutaizes kinos, kudai ozutetah jo sulakuul Germuanes enzimäi nemčoin kielel. Sit sie rodieu kiätty frantsien kielel. ARTE TV:n miehet käydih Kinnermäl kuvuamah Kalmikovien perehen matkailubiznessua, Vieljärvel kuvuamah Karjalan Kielen Koin ruadoloi da paikallistu rahvastu, sit vie Anuksen piirih kuvuamah meččyvardoičuslaitoksen ruaduo. Petroskoil kuvattih taidoilijoi.

Yksi kinon luadijois Martin Štrigel’ jo oli Karjalas vuvvennu 2012 šveitsarskoin TV:nke. Häi hyväl mielel tuaste tuli tänne. TV-mies sanelou:

– Pidäs tälgi kerdua tulla informatiivine kino, olemmo aiga hyväs mieles tuanmoizen materjualan suaduu. Tuaste kummeksimmo, mittumat tiä ollah rahvas. Rahmannoit, hyväntahtojat, ainos ollah valmehet tulemah abuh. Ei olla liijakse kehujat, ga ruadajat da oman dielon tiedäjät. Ylen äijäl suvaijah omua roindu- da eländykohtua. Jevroupas rahvas, voibi sanuo, jo ei olla kiini omis eländykohtis. Hyö ainos ajellah, yhtes kohtas eletäh, sit muutetah toizeh. Karjalas on ihan toizin. Osobi karjalazet, kandurahvas. Oma paikku da ymbäristö heile on piädielo...

Sano oma mieli

Kai kommentariet tarkistetah. Viestit, kudamis on pengomistu, rahvahan vihua da VF:n zakonoin vastastu kuhkuttamistu, otetah iäre.

Lugijan mielii: *
Sinun nimi: *
 
Partn`ourat