L’apačok tarkottau tilkkuista

Arhankelin kielen murtehešša on hellä l’apačok-šana, kumpani tarkottau pientä tilkkuista. Šiitä šanašta ilmešty naisien L’apačiha-klubin nimi, kumpani tänä vuotena juhliu 10-vuotispäivyä. Naisien klubi kašvo šeurašta, kumpasen alkuhpanijina oltih M.V. Koškina ta V.G. Anisimova. Vuotena 2003 aktiiviset kemiläiset naiset voitettih Sosiaalipuoluššukšen ministerijön kilpailušša pienen grantin naisien klubin järještämiseh. A paikallisešša kulttuurikeškukšešša löyty huoneh klubin issuntoja varoin. L’apačiha-klubin deviisina ollah taiteilija Nikolai Rerihin šanat: ”Kaunehuon merkin alla myö ilosešti aššumma. Kaunehuolla voitamma. Kaunehuolla molimma. Kaunehuolla yhissymmä”. Šyyškuun 6. päivänä Petroskoin Perintehellisien käsitöijen keškukšešša (Kirovin katu, 13) avautu L’apačiha-klubin L’apačok tarkottau tilkkuista -näyttely. Šiinä on esitetty tilkkusista luajitut pannoot, täkit, laukut, šekä rahvahan kuklat. Tuttavuštuo mukavih käsitöih voipi 28. šyyškuuta šuaten.