Kuoroja ympäri Karjalua yhtyy Laulujuhlih

Viime vuotena Laulujuhlat piettih Sortavalašša. // Kirjuttajat: Kuva: Jelena Filippova
Kešäkuušša järještämien Petroskoin Laulujuhlien ohjelma lupuau olla erittäin šuuri ta monipuolini. Yli 30 kuoruo ta yhteheš noin 900 ošallistujua vuotetah yhtyvän tähä tapahtumah. Laululavoilla esiintyy laulajie Karjalašta, Šuomešta ta Virošta. Kuoroja melkein joka Karjalan piiristä yhtyy tämänvuotisih laulujuhlih. Ohjelman aikana pietäh kuorojen harjotukšie, esitykšie, konserttija šekä Kuorolaulu 2000-luvulla – perintehet ta nykypäivä -seminaari.
Laulujuhlan puittehisssa 14. kešäkuuta Kanšallisen teatterin šuurella lavalla esitetäh Eigu-nimini karjalankielini koko perehen ooppera.
Konserttija järješšetäh kaupunkin eri lavoilla: Karjalan filarmonijašša, Petroskoin K. Raution musiikkiopistošša, Lapšien musiikkikoulušša, Kanšallisešša musejošša ta Kanšallisien kulttuurien keškukšešša. Kaikki pivot ta konsertit ollah yleisöllä avoimie ta makšuttomie.
Laulujuhlien huippuna on 15. kešäkuuta järještämä Šuuri Karjalaini pruasniekka Petroskoin Kiirovin aukiella, missä piänäyttämöllä pietäh kuorojen šuuri Laulukenttä-yhteisesiintymini. Šuovatan iltaohjelmah yhtyy šamoin Sattuma-folkloriyhtyveh (Petroskoi), Vladimirskije rozhečniki -lauluyhtyveh (Vladimir) šekä Šuomen Värttinä-yhtyveh.
Karjalan, Venäjän ta Šuomen laulukulttuuri tulou vahvalla esillä Laulujuhlissa. Tapahtuman järještäjien mieleštä piäajatukšena onki še, jotta laulun ta musiikin vaikutukšella šuaha yhistyä ihmiset rajan eri puolilta.
-
Työnnä kirjutuš
-
Još löyvät virheitä, kirjuta meilä!
Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!