Pruasniekan avattih pikkaraiset tytöt ta pojat lapšien folklooriryhmäštä, kumpaset vašta tänä vuotena ruvettih opaštamah karjalan kieltä lauluissa, kisoissa ta lapšien leikkilöissä. Lapšet esitettih vierahilla venäläistä rahvahan Nakris-starinua karjalan kielellä. Starinan mukah šuuri nakris oli šuatu muašta, še toi hyvin äijän iluo kuin näyttelijillä, niin ni kaččojilla. Pienet artistat kučuttih kaikkie tanššimah karjalaista Tule piirih -tanššie.

Iltua jatko karjalaini rahvahan Hete-folklooriryhmä tanššineh, piileikkineh ta lauluineh.

Folklooriryhmän lapšilla še oli enšimmäini esityš karjalan kielellä. Lapšilla ičelläh niin miellytti spektakli karjalan kielellä, jotta hyö haluttais esittyä šitä uuvveštah ta panna lavalla toisieki šuurempie starinoja. Lapšien kera karjalan kielen opaššus jatkuu ielläh.

Ilottau še, jotta lapšet omien vanhempien kera, monet kumpasista iče käyväh karjalan kielen kurššiloilla, yheššä opaššetah omua kieltä ta tutuššutah enemmän karjalaiseh kulttuurih.