Perintehen mukah Tašavallan päivyä vietetäh joka vuosi 8. kešäkuuta. Tänä vuotena enšimmäistä kertua pruasniekan šuurimmat toimenpivot järješšetäh ei Petroskoissa, ka tašavallan Priäžän piirissä.  

Pruasniekan ošallistujie vuottau šuuri mukava ohjelma. Kešäkuun 6.–8. päivinä Priäžäššä ta Priäžän piirissä pietäh VII Muajilman karjalaisien kerähmö ta Tašavallan naisien foorumi, ilmotetah KT:n kunnivokanšalaista, myönnetäh tašavallan Sampo-kilpailun palkintoja kulttuurin, taitehen ta kirjallisuuvven aloilla, järješšetäh Karjalan piirien ta kaupunkien näyttelyjä, IV šuomelais-ugrilaisien kanšojen Suguvastavundu-festivaali ta perintehellini Huumorin festivaali Kintahan kyläššä.

Tašavallan šuurimman pruasniekan päivinä Priäžäh keräytyy VII Muajilman karjalaisien kerähmön yli kakšišatua ošallistujua. Täštä kerto KT:n kanšallisuušpolitiikan ministeri Lana Migunova. Kerähmöh keräytyy delegaattie Karjalan kaikista piirilöistä, Leningradin, Murmanskin ta Tverin alovehilta, šekä Šuomešta. Šeloššukšen piäteemakši tulou karjalan kielen ta kulttuurin šäilyttämini ta kehittämini.

– Mie kačoin, kuin Priäžä valmistautuu tulijah pruasniekkah ta voin šanuo, jotta piätöš Tašavallan päivän viettämiseštä Karjalan piirissä oli epyälömättä oikie, korošti issunnon lopušša KT:n piämieš. – Olen varma, jotta še tulou hyväkši stimuliksi piirien johtajilla kaččuo omah piirih uuvvella keinoin ta panna kaikki hyväh järješšykšeh.

Vuotena 2014 Tašavallan päivyä niise meinatah viettyä Karjalan piirissä.