Kymmenen vuotta takaperin Petroskoissa ilmešty enšimmäini perehfolklooriyhtyveh. Šen peruštamisen alkuhpanijana oltih kakši hyvin tunnettuo muusikkuo Arto Rinne ta Dmitri D’omin. Uuteh kollektiivih šamoin yhyttih vielä hyvin nuoret Arton tyttö Eila ta Dmitrin poika Vlad.

Nimiki yhtyvehellä oli kekšitty ihan vaštuaja šen peruštamisen šyytä – Sattuma.

Alušta yhtyveh esitti šuomelaista kanšanmusiikkie. Aikuiset soitettih eri musiikkišoittimie, lapšet soitettih viuluja. Yhtyvehen enšimmäisen Sattuma-nimisen CD-levyn ilmeštymisen jälkeh yhtyveh läksi enšimmäiseh vierailumatkah Yhyšvaltoih.

Ajan mittah Sattuman ohjelmisto šuureni, muusikot otettih käyttöh ušiempie šoittimie. Yhtyvehen esittämien laulujen joukošša oli karjalaisie ta venäläisie lauluja, šekä omie šävellykšie. Muusikko Dmitri D’omin iče luatiu musiikkišoittimie. Kollektiivin käytöššä onki äijän D’ominin omin käsin luatimie šuomelais-ugrilaisien kanšanšoittimie.

Kymmenen vuuvven aikana perehyhtyveh on ošallistun konserttien kera eri folkfestivaaliloissa kuin Venäjällä šamoin ulkomaillaki. Sattuma yhtyy läheš kaikkih šuurih Petroskoin tai tašavallan folkmusiikkitapahtumih. Petroskoi-Joensuu -junaki läksi enšimmäiseh matkah viime vuuvven talvikuušša Sattuman laululla. Yhtyvehen muusikot oli kekšitty uuvven laulun varta vaššen tätä tapahtumua.

Sattumalla on ilmeštyn viisi alpumie.

Nyt Sattuma valmistautuu uuteh vierailumatkah. Yhtyveh lähtöy vierailulla Ameriikkah.