Lehistötilaisuuteh oli kučuttu lehtimiehie Petroskoista šekä tašavallan eri piirilöistä. Tilaisuutta oli voinun šeurata netissä šuorašša lähetykšeššä.

Enšimmäini kyšymyš koški Karjalan 100-merkkipäivän juhlimista.

– Venäjän presidenti jo allakirjutti ašetukšen KT:n merkkipäiväštä. Jo rupesima valmistautumah täh šuureh tapahtumah. Pitäy šuaha kuntoh tiet, kaikki ašemat, lentoašemat, palvelu- ta kulttuurilaitokšet. Tietyšti, vuotamma ehotukšie Karjalan eläjiltä, jotta emmä unohtais mitänä.

– Viime vuotena oli šuatu remonttie noin 80 kilometrie Kola-tietä, tänä vuotena on tarkotuš kohentua vielä noin 90 kilometrie. Tänä vuotena teijen remonttih tašavallašša annettih 6,7 milliadrie rupl’ua, kerto piämieš.

Piämiehen šanojen mukah vuoteh 2016 šuunitellah rakentua uuši magistrali Sortavalah ta vuoteh 2018 Priäžäh. Aleksand Hudilainen korošti, jotta kohta Piiterin tienoilta voit piäššä Priäžäh šuate 2,5 tunnissa.

Koštamukšen eläjie hyvin huoleššuttau še, jotta Koštamuš-Petroskoi ta Koštamuš-Piiteri -junien kulkomini on harvennun.

– Myö piemmä neuvotteluja Okt’abr’skaja-rautatieyhtijön kera Koštamukšen matkuštajajunien alkuperäisen aikataulun palauttamisešta. Toivomma, jotta heinäkuun puolivälissä šuamma piättyä tämän kyšymykšen.

Aleksand Hudilainen huomautti, jotta hyvänä uutisena on Piiteri-Petroskoi -junan kulkomini. Nyt še ajau kuuši kertua netälissä ta matka keštäy nellä tuntie 55 minuuttie. Piämiehen šanojen mukah Petroskoin ta Joensuun välini junayhteyš ei tovistan iččieh. Šen kohtalo piätetäh lähiaikana.

– Huikie on toičči kaččuo mimmosešša kunnošša ollah Petroskoin kavut ta pihat. Još piäkatuja šiivotah, niin pienet pihat ollah šiivuomatta. Piätehtävänä on panna kaupunki kuntoh. Tämä tila on muutettava ihan lyhyöššä ajašša, kommentoi piäkaupunkin kuntuo Aleksandr Hudilainen.