Joka vuoši 8. kešäkuuta Karjalan tašavalta juhliu omua šyntymäpäivyä. Tänä vuotena tašavallan 93-vuotisjuhlan piätapahtumat oli piätetty järještyä Priäžäššä.

Juhlaohjelma alko jo 7. kešäkuuta, šilloin Priäžäššä starttasi šuomelais-ugrilaisien rahvahien Suguvastavundu-festivaali. Ošallistujat Venäjän eri alovehilta, Šuomešta ta Karjalašta näytettih omie kanšallisie kulttuurie. Ihan huomenekšešta alkaen kaikki halukkahat voitih nähä tai ošallistuo erilaisih juhlatoimehpitoih.

KT:n šyntymäpäivänä oli avattu XI naisien forumi, mih yhty yli šata etuštajua eri piirilöistä. Forumin teemana oli ekologija.

– Meilä ei ole toisarvosie propleemie, ekologijan kyšymyš on etupaikalla. Ekologijan tilašta riippuu elämänluatu ta eläjien terveyš, korošti KT:n piämieš Aleksand Hudilainen.

Kahen päivän aikana forumin ošallistujat käsiteltih ta ehotettih monta projektie, kumpasien tarkotukšena on auttua tašavallan naisie šekä pereharvojen populiarisointi.

Pruasniekkapäivän keškisimpie pitoja oli hiätilaisuuš Karjalaiset hiät -tyylissä. Uuvven perehen peruššettih Vladimir Martinov Vitegrašta ta Anna Griškina Priäžäštä. Hiämenoih ošallistu pat’vaška, itkijät, kumpaset kaimattih nuorie uuteh elämäh. Hyö kerrottih karjalaisie šananpolvie, molompien puolien heimolaiset kyšeltih toini toistah šulhasešta ta moršiemešta, ta Vladimir ta Anna šuatih lahjoja KT:n piämieheltä ta paikalliselta hallitukšelta.

Pruasniekan jatkona oltih uuvven urheilukentän avajaiset, kumpasen rakentamista oli rahottan Gazprom-yrityš. Šiinä oli pietty enšimmäini Čalnan ta Priäžän joukkojen välini yštävyyšpeli.

Pruasniekkapäivän aikana Priäžän eläjät ta vierahat voitih kuunnella paikallisien ta Petroskoin lauluryhmien esiintymisie. On jo tullun tavakši, jotta Karjalan juhlatilaisuukših esiinnytäh Venäjän tunnetut artistit tai laulajat. Tänä vuotena pruasniekan kuččuvierahina oltih laulajat Jelena Vaenga ta Viktorija Daineko.