Alušta Eigu-ooppera oli kirjutettu šuomen kielellä. Jälešti oopperan käsikirjutukšen kirjuttaja ta musiikin šäveltäjä Paavo Joensalo kiinnoštu kiäntämäh šitä enklannin kielellä ta vuotena 2008 še oli esitetty Irlannin Dublinissa.

–  Ka aina huaveilin, jotta še kiännettäis karjalakši, virokši, unkariksi, ruočiksi tahi venäjäkši. Kakši vuotta takaperin Karjalan Kielen Šeura kiänty miun puoleh ta ehotti šen iče. Paavo Harakka rupesi kiäntämäh oopperua karjalakši, šelitti Paavo Joensalo.

Ohjuaja ei šyyttä tahton, jotta ooppera olis kiännetty karjalan kielellä. Miehellä ičellä on karjalaiset juuret ta hiän hyvin pakajau karjalakši. Joensalon tuatto oli Šuojärven piiristä kotosin, muamo on suistamolaisie karjalaisie, tunnetun runonlaulajien Härkösien šukuo.

–  Konša alko šota, miun tuatto ta muamo elettih Korpišeläššä. Muamo läksi evakkoh Länši-Šuomeh. Tuatto kuoli pakkaiskuušša 1942 Karhumäjen piirissä. Mie šynnyin kahen netälin piäštä hänen kuolomašta, šentäh en ole konšana tuattuo nähnyn. Miun muamo pakasi karjalakši, ämmö ta ukko niisi, šamoin kuin monet muutki heimolaisiet. Lapšena opaššuin karjalua, šiitä unohin, a šiitä tuaš rupesin oppimah kieltä, muisteli Paavo Joensalo.

Karjalašša ollešša joensuulaiset artistat esitettih oopperan Veškelykšeššä, missä oli täyši šali kaččojie ta Petroskoissa, minne mintäh lienöy rahvašta ei keräytyn äijän. Kešällä artistat esitetäh oopperua Nurmekšen Bomba-talolla, Šuojärven pitäjäšeuran pruasniekašša, šyyškuušša Helsinkissä.

–  Esitämmä šen Vanhašša oopperašša Aleksanterin teatterissa. Iče enši kertua kuuntelin ta kačoin šielä oopperua. Nykyjäh iče lavalla noušen, on ylpie Paavo Joensalo.