
Luonnotalouš-näyttely kertou karjalaisien piäelinkeinoista // Kirjuttajat: Olga Smotrova
Heinäkuun alušša KT:n Kanšallisešša musejošša oli avattu Luonnontalouš (Натуральное хозяйство) -näyttely, kumpani on omissettu Karjalan eläjien perintehisillä töillä 1900-luvulla ta 2000-luvun alušša. Šiih kuuluu kahen uušien šalien ta lapšien leikkihuonehen avuamini.
– Nyt luonnontalouš on kriisitilantehešša. Mitein ihmiset elettih ennein? Hyö kaikki luajittih omilla käsillä. Pereh oli niin kuin pieni yrityš, työ yhisti perehen jäšenie. Ennein kalaššuš ta mečäššyš oltih piäelinkeinoina, nyt šiitä on tullun huvi rikkahilla ihmisillä. Pitäy muistua vanhoja keinoja ta ymmärtyä, jotta niijen pohjalla voi kehittyä uušie tehnologijoita, kerto Kanšallisen musejon johtaja Mihail Goldenberg näyttelyn avajaisissa.
Näyttelyn tarkotukšena on rahvahien tietojen ta perintehien popularisointi nykyaikasien trendien kontekstissa.
– Haluomma šanuo šuuret passipot Potaninin fondilla rahatuvešta, KT:n kulttuuriministerijöllä, Kanšallisuušpolitiikan ministerijöllä. Kaikilla niillä, ket autettih näyttelyn valmistamisešša. Meistä tuli šuuri, yštävällini ryhmä, šano projektin johtaja Denis Kuznetsov.
Pitäy mainita, jotta kaikki ainehistot uušissa šaliloissa on kiännetty enklannin kielellä, karjalan kielen kahella murtehella ta vepšän kielellä. Kiäntäjinä oltih Natalja Pellinen, Jelena Filippova ta Marina Giniatullina.
-
Työnnä kirjutuš
-
Još löyvät virheitä, kirjuta meilä!
Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!