Šuomelaini folkyhtyveh on kuulusa ympäri muajilmua. Karjalaššaki šen kannattajie on äijän. Värttinä oli vain kerran käynyn Petroskoissa, še oli 26 vuotta  takaperin. Nykysen joukon laulajista šilloin Petroskoissa oli vain Mari Kaasinen. Mari muistelou, jotta Varttinä šilloin oli šuuri, joukošša oli yli 20 henkie.

Varttinän peruštajina ollah čikokšet Mari ta Sari Kaasiset. Vuotena 1983 hyö keräyvyttih yhteh. Alušta esitettih vanhoja karjalaisie runoja ta kantelehen šoittuo, ka kohta neitiset ymmärrettih, jotta pitäy tuuvva näkyvih unohukših jiänyt karjalaini lauluperinneh, jotta še kuuluis uuteh luatuh. Ta še rupeiki kuulumah ei vain omašša muašša, šuomelais-ugrilaista kulttuurie kylväjä Varttinä tuli kuulusakši koko muajilmašša.

Nykyjäh yhtyveheššä lauletah Mari Kaasinen, Susan Aho ta Karolina Kantelinen. Marilla ta Karolinalla on karjalaiset juuret. Mari on šyntyn Šuomen Pohjois-Karjalan Rääkkylän kyläššä. Karolinan juuret tuaton puolešta ollah Impilahešša. Kaikin ollah ammatilliset kanšanmusiikin tietäjät. Mari ta Susan opaššuttih Sibeliukšen akatemijašša, Karolina kirjutti väitöškirjan Karjalan joikuloista. Konša hiän esittäy niitä, kuuntelijilla ihan henkie šalpuau, niin hyvä iäni hänellä on. Mari ta Karolina opaššetah kanšanmusiikkie Helsinkissä. Naiset iče kirjutetah tekstijä ta musiikkie Värttinyä varoin.

Tänä vuotena yhtyveh täyttäy 30 vuotta ta konsertti Petroskoin Laulujuhlissa kuuluki vuotispäivän vierailumatkoih.