Kešällä 1930 vuotena Karjalan tašavallan alovehella Povenčan ta Vienanmeren välillä oli alotettu Vienanmeren-Itämeren kanavan šuunnittelomista ta rakentamista. Še oli Neuvoštoliiton ajan mahtavimpie rakennuštyömaita. Rakentamisen enšimmäiset luonnošprojektit oli esitetty kešällä 1931 ta jo šaman vuuvven lopušša rakentamistyöt oli alotettu.

Kanava oli rakennettu vankileirijen šatojen tuhanšien vankien voimilla. Rakennuštöih ošallistujilla vankiloilla oli kekšitty erikoisnimityš – ”каналоармейцы” ili kanavanarmeijalaiset. Ennätyšlyhyöššä ajašša (20 kuukauvešša) oli šuatu rakentua 227 km:n pituni vesireitti korpimeččien, šoijen ta kallivojen läpi. Šillä reitillä oli ašetettu 19 laivašulkuo, 15 patuo, 49 rantapatuo ta 12 vejenjohtuo. Puu, kivi ta pesku oltih perušrakennušainehena ta rakentajien työvehkehinä oltih kärryt, lapiet, kirvehet ta hakut.

Vienanmeren-Itämeren kanavan rakentamini oli lopetettu 20. kešäkuuta 1933. Viijen päivän piäštä enšimmäiseh matkah kanavua myöte läksi Čekist-höyrylaiva, a kuukauven piäštä Vienanmeren kanavua kulki laiva, kumpasella oltih valtijon šilloset johtajat Iosif Stalin, Kliment Vorošilov ta Sergei Kirov. Kanavan juhlalliset avajaiset piettih 5. elokuuta 1933.

Talouvelliselta kannalta Vienanmeren-Itämeren kanava ei ollun huippumäneššykšenä. Vuotena 1940 kanavan myöte kuletetun tavaran miärä oli noin miljoona tonnie, mi oli vain 44% šen kuletuškyvyštäh. Strategijan kannalta kanava yhisti Vienanmeren ta Itämeren ta anto mahollisuuvven kulettua laivoja šitä myöte.

Šuuren Isänmuallisen šovan aikana kanavan šuvioša oli melkein kokonah hävitetty. Šovan jälkeh kaikki hajotetut kohtehet oli uuvveštah rakennettu, heinäkuušša 1946 kanava tuaš otettih käyttöh.

Vienanmeren-Itämeren kanavan rakentamini muutti alovehen geografijan ta talouven, varšinki oli peruššettu uuvvet kaupunkit ta posolkat: Belomorsk, Karhumäki, Segeža, Nadvoitsa. Povenčašta tuli šuuri šatama, a Belomorskista merkittävä teollisuuškeškuš. Kanavan käyttö anto mahollisuuvven kehittyä tällä alovehella puunjaloššuš- šekä šellu- ta paperiteollisuutta.