Uušie šuunnitelmie
Teatterin sesonki avautuu karjalankielisellä Emähukka-näytelmällä. // Kirjuttajat: Mikko Ollikainen
#18
(370)
Karjalan Kanšallisen teatterin artistat kerrottih tulovašta teatterikauvešta. Šuunnitelmissa ollah teatterimatat ta uuvvet näytelmät Shakespearen, Čehovin, Puškinin näytökšien mukah.
Teatterišykyšy alko artistoilla teatterimatalta Vologdah. Šielä meijän artistat esitettih nellä näytelmyä venäjän kielellä. Kaikki liput oli myöty jo keškikešällä. Pimiekuun lopušša Vologdan lapšien ta nuorison teatterin artistat vuoroštah tuuvvah Petroskoih omie Vanhin poika-, Kiršikkatarha- ta Kišša šuappahissa -näytelmie.
Kanšallisen teatterin sesonki avautuu 4.–5. šajekuuta karjalankielisellä Emähukka-näytelmällä. A vuuvven enšimmäini enši-ilta on šuunniteltu pimiekuun 8.–10. päivih. Teatterin piäohjuaja Andrei Dežonov valmistau näytelmyä William Shakespearen Kaheštoista yö taikka Mitä tahotta? -näytökšen mukah.
Uuvvenvuuvven loman aikana nuorilla kaččojilla esitetäh Lukomorjan luo -näytelmä Aleksandr Puškinin starinojen mukah. A kevyällä tulou norjalaisen Šeikkailuja Jolki-na-Gorke mečäššä -starinan enši-ilta. Molommat näytelmät ohjatah yhteistyöššä Kuklateatterin kera Starinojen melliččä -projektin puittehissa.
Šen lisäkši Kanšallisella teatterilla on šuunniteltu teatterimatka Kemih, Belomorskih, Koštamukšeh ta norjalaiseh Kirkenes-kaupunkih. A Petroskoih Vologdan teatterin lisäkši tullah Jekaterinburgin Nuoren kaččojan teatterin ta norjalaisen Samovuara-teatterin artistat.
-
Työnnä kirjutuš
-
Još löyvät virheitä, kirjuta meilä!
shi.namins.k2015@gmail.com
Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!