Kiži – Venäjän nähtävyyškohta

Yleisvenäläiseššä Rossija 10 -kilpailušša valittih 10 Venäjän tunnetuinta nähtävyyškohtua. Niijen luvušša ollah Kiži-musejo, Rostovin, Kolomnan, Pskovin ta Nižni Novgorodin kremlit, Troitse-Sergijevin lavra, Petergof, Baikal-järvi, Mamain kurgaani ta Rodina-mat’ zov’ot -muistopačaš, šekä Serdtse Čečni -moskeija. Uniikki Kižin pogosta, kumpani on rakennettu Oneganjärven Kiži-šuarella, on Karjalan tašavallan yksi nimikorttiloista. Istorijallis-kulttuurini ta luonnon kompleksi on tunnettu Venäjän kanšojen kulttuuriperinneh ta UNESCO:n muajilman kulttuuri- ta luonnonperinneh. Kižin ansampelin helmenä on koko muajilmalla tunnettu Jumalan pyhänmoisekši muuttumisen 22-kupolini piäkirikkö. Kilpailun alkuhpanijina oltih Rossija I -TV-kanava ta Venäjän muantiijon liitto. Finalih ošallistu 30 objektie, kumpaset Venäjän eläjät valittih 700:šta luonnon ta arhitektuurin nähtävyyškohašta ta kumpaset šuatih kaikista enin iänijä kilpailun enšimmäisissä vaiheissa. Rossija 10 -kilpailun šiäntöjen mukah kaikki 10 valittuo tunnetuinta nähtävyyškohtua ollah kilpailun taša-arvosie voittajie.