Uuvvet projektit liikkehellä

Tämän vuuvven forumilla tuli rahvašta Šuomešta ta Venäjän kaheštakymmeneštä viiještä alovehešta, yhteheš yli 300 henkie. Forumih lähetettyjen projektiehotukšien miäräki oli männehih vuosih verrattuna šuurempi. Niitä oli 374. Šentäh forumin aikana piettyjä neuvotteluja oli äijän – 137. Nämä neuvottelut, konša partn’orit keräyvytäh šeikkuimah yhtehisie projektija, ollah forumin tärkeitä töitä. Ei internetin, eikä telefonin kautti, kun kahen kešen šuau tarkkah šelittyä kaikki asiet, kaikki tulevat työt. Totta šanojen pahakši mielekši… Šuurin oša forumin ohjelmašta oli mintäh lienöy luajittu niin, jotta rahvaš, meikäläiset ta šuomelaiset, oltais kuin vain vois enemmän erikseh toini toisešta. Kuitenki šiitä huolimatta työtä oli. Tuli šelittyä ta panna alkuhki yhtehiset työt. Täštä puolešta kaččoen forumi oli hyvä ta hyövyllini meikäläisillä. Šanakši, Karjalan etuštajie forumissa oli yli 30 henkie, kulttuurilaitokšien, joukkoviestimien ruatajat ta yhteiskunnallisien liittojen rahvaš.