Laučat-illačulla laučoilla ei issuttu

Viime šuovattana Priäžän kulttuuritalošša oli jäješšetty Laučat-illačču, kumpaseh keräyvyttih Karjalan parahimmista parahat folkjoukot, niijen šuvaiččijat ta kaikki, ket tykätäh kanšanmusiikkie. Enšimmäisenä lavalla esiinty vepšän kielellä laulaja Noid-joukko. Viime aikoina Noid on äijän ajellun muajilmua myöten. Šajekuun lopušša joukko kävi esiintymäh Virošša, Heimopäivät-pruasniekan yhteyveššä. Priäžän illačulla Noid toi rahvahalla hyvän mielen ta tunnelman, šai tulijie kanšanmusiikin puoleh. Joukon lavalla ollešša monet jo lähettih tanššimah. Karjala-joukon artistat esitettih ohjelmuah šuorah šalissa. Hyö näytettih muutoman tanššin, katrillin ta piirileikin. Šiitä kaččojat ta artistat yheššä tanššittih Talonpojan tanššie ta Kruugua. Skylark-joukko esitti Karjalan kantarahvahien ta skandinavilaista musiikkie. Joukon tanššijat niise laškeuvuttih lavalta šalih ta tanššittih yheššä kaččojien kera. Illačun tunnelma oli ylen lämmin ta yštävällini, niin kuin aina on šuomelais-ugrilaisissa illaččuloissa. Rahvaš tanššittih, laulettih ta hyvällä mielin paistih toini toisen kera. Laučat-illačun šuurimpana tähtenä (englanniksi headliner) oli Sattuma-joukko. Šiäntöjen mukah headliner esiinty viimesenä. Sattuma esitti lauluja uuvvešta Kyllä joo -albumista šekä vanhojaki, kaikilla tunnettuja. ”Ongo Petroskoi kaunis linnaine?” – laulettih kaikin yheššä. Karjalan kielen koti –projektin järještäjät niise oltih illačulla. Olga Gokkojeva kerto šuuret passipot kaikilla, ket ušotah karjalan kielen kojin tulevaisuuteh ta avuššetah šen rakentamista. Illačulla oli kerätty 14 tuhatta rupl’ua. Nämä rahat käytetäh kojin rakentamiseh.