”Kešätila” ympäri vuuvven

Mi ois parempi, talvi-, kešä- vai sesonkiaika? Monissa maissa kakši kertua vuuvvešša kevyällä ta šykyšyllä kellojen ošoittimet šiirretäh tunti eteh tahi tuakše päin. Venäjällä kellot šiirrettih viimekši kevyällä 2011VF:n šillosen presidentin Dmitri Medvedevin alottehešta ta šen jälkeh ei enyä košettu. Jo toista vuotta Venäjä eläy niin šanotun kešäajan mukah, onnakko väittelyt šen hyövyštä ta asienmukaisuuvvešta on jatuttu tähä šuate. Ammusista ajoista alkuan ihmini eli luonnonajan mukah. Hiän nousi päiväsen kera ta rupesi muate kun päiväni laškeutu ta pimeni. Onnakko elämän kehityš johti šiih, jotta tämä ihmisen ta luonnon välini yhteyš vähitellen häipy. Nykyjäh venäläiset eletäh ajan mukah, kumpani on kahta tuntie ieššä luonnonaikua. Vielä vuotena 1930 Venäjällä oli šiirretty kellot tunti eteh päin. Näin talouvellisien šyijen takie oli otettu käyttöh vyöhykehaika. Vuotena 1981 šamojen šyijen takie oli hyväkšytty sesonkiaika, konša kellot šiirrettih kakši kertua vuuvvešša; kevyällä ta šykyšyllä. Kellojen šiirto herätti äijän kiistua ta moitteita. Monet ihmiset valitettih pahua vointie ta unista oluo. Karjanhoitajatki oli moničči kerrottu mielieh kellojen šiirtämistä vaštah, šentäh kun näijen muutokšien takie pitäkši aikua laško lehmien lypšymiärä. NykyjähVF:n Duuman kanšanetuštajat šyväšti mietitäh šitä, jotta šiirtyä kellot tuakše päin. Voit olla, jotta enši vuotena Talviolimpialaiskisojen jälkeh tämä kyšymyš tuaš noššetah käsittelyllä ta šeuruavana šykyšynä venäläiset šiirrytäh talviaikah.