Kielien ammattimiehien kouluttamini jatkuu

1) Kielen, kirjallisuuvven ta istorijan instituutin ruataja L’udmila Ivanova kerto karjalaisen fraseologijan keryäjäštä ta tutkijašta Vieno Fedotovašta. // Kirjuttajat: Olga Smotrova
#22
(374)
Venäjän tietoakatemijan Karjalan tietokeškukšen Kielen, kirjallisuuvven ta istorijan instituutti aina on toimin tiiveheššä yhteistyöššä Petroskoin valtijon yliopiston Itämerenšuomelaisien kielien ta kulttuurin tietokunnan kera. Jokavuotini tietehellini Bubrihin luvennot -konferenšši on tämän yhteistyön tulokšie. Ajatuš konferenššin pitämiseštä šynty vuotena 2000. Šeuruavana, 2001 vuotena piettih enšimmäini konferenšši. Vuosien mittah konferenššista tuli keškuštelukenttä, missä tutkijat voitih kertuo oman tutkimuštyön tulokšista ta vaihtua kokemuštah. Konferenšših tavallah ošallissutah kuin kokenehet tietomiehet ta opaštajat, šamoin alottajat tutkijat, jatko-opaštujat ta studentit.
Tämänvuotini konferenšši oli järješšetty Karjalan kielen vuuvven puittehissa. Toisualta ei voi olla mainiččomatta, jotta vuotena 1993 peruššettu Itämerenšuomelaisien kielien ta kulttuurin tietokunta lopetti toimintuah juuri tänä vuotena. Nyt še toimiu Itämerenšuomelaisen filologijan laitokšena Petroskoin valtijon yliopiston filologisen tietokunnan yhteyveššä. Tätä kyšymyštä košettih konferenššissaki. Petroskoin valtijon yliopiston vararehtorin Vladimir S’un’ovin mieleštä näih muutokših pitäy šuhtautuo filosofisešti. Toičči šemmoset muutokšet ollah ihan välttämättömät.Vaikka oppilaitoš on mänettän statussin, še ei missänä tapaukšešša vaikuta opaštamisen tašoh ta luatuh. Opaštamini ta kielien ammattimiehien kouluttamini jatkuu. Ta Bubrihin luvennot -konferenšši on vielä yksi tovissuš šiitä.
Konferenššin teemana oli Karjalan tutkijien panoš Karjalan šuomelais-ugrilaisien kielien šäilyttämiseh ta kehittämiseh. Venäjän Tietoakatemijan Karjalan Tietokeškukšen ta Petroskoin yliopiston vuorovaikutuš tuntuu aina. Šuurin oša Kielen, kirjallisuuvven ta istorijan instituutin ruatajista ollah Petroskoin yliopiston piäštökkähie. Monet instituutin ruatajat varšinaisen työ rinnalla pietäh luventoja yliopiston studenttiloilla.
-
Työnnä kirjutuš
-
Još löyvät virheitä, kirjuta meilä!
Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!