Lapšet esitetäh karjalaisie starinoja

Pimiekuun keškipuolella Priäžän piirin vanhašša Vieljärven kyläššä piettih tašavallan Karjalaini šuarna -festivaali. Šitä ennein, pimiekuun alušša, Kalajovešša piettih Vepšäläini starina -festivaali. Karjalaini šuarna on enšimmäini šemmoni lapšien festivaali-kilpailu. Ka šillä on vanhempi velli: Nerokaššali-kilpailu, kumpaseh ošallissutah nuoret ta vanhemmat karjalakši pakasijat artistat. Karjalaini šuarna -kilpailušša omie neroja voijah esittyä vain lapšet ta koululaiset. Festivaalih tuli 12 kollektiivie Vieljärveštä, Jessoilašta, Priäžäštä, Tuuksašta, Kotkatjärveštä, Aunukšešta, Kalevalašta ta Petroskoista, yhteheš noin šata ošallistujua. Šentäh kun kilpailu piettih enšimmäistä kertua, esittämäh omua taituo ta esimerkkie tuli vanhemmanki polven näyttelijie: Karjalan Kielen Kodi -liiton teatterijoukko ta Kotkatjärven artistoja. Käsittelyn jälkeh arvoštelijat ilmotettih parahat kollektiivit ta kolme voittajua. Kolmannella paikalla piäštih nuoret artistat Vieljärven koulušta Reboi da kukki -starinan kera (ohjuaja Olga Stanislavova). Toisen paikan šai Jessoilan lapšien Hete-folkloorikollektiivi Kondii-soittai-starinašta (ohjuajat Tamara Petrova ta Tamara Sergejeva). A enšimmäini paikka oli annettu Kalevalan koulun artistoilla Mečän muoti -starinašta, kumpasen hyö iče kekšittih. Lapšien ohjuajina oltih Nina Aleksejeva ta Valentina Sem’onova. Karjalaini šuarna -festivaalin kaikki ošallistujat šuatih muistolahjoja: kuppija ta magniittija kilpailun logotipin kera. A festivaalin voittajilla nyt on mahollisuuš kaččuo Karjalan Kanšallisen teatterin Ruškie kukka -näytelmän ta käyvä Karjalan Kanšallisen musejon Luonnontalouš-näyttelyh.