Hete, kumpasešša lirajau karjalan kieli

Tämän karjalaisen talon emännät, rahvahan Hete-folkloorikollektiivin artistat, otettih vaštah vierahie leivällä-šuolalla. Kuin Karjalašša on tapana, tupaantulijaisilla emännät šuatih lahjoja ta onnittelušanoja. Kanšallaisjärještöjen etuštajat luvettih runoja ta laulettih hyvittelylauluja omilla kielillä, še ilahutti kaikkie. Rahvahan Hete-folkloorikollektiivin artistat laulettih lauluja karjalan kielellä, a kollektiivin käsityömuasterit tuotih uuteh taloh обереги kukloja, kumpasie ommeltih omin käsin. Folkloorikollektiivi leventi omua toimintuah ta nyt šiinä opaššetah lapšie karjalaisih lauluih ta tanššiloih. Nuoret artistat enšimmäistä kertua esiinnyttih kaččojilla karjalaisien piirileikkijen ta kisojen kera. Šen jälkeh kaikkie kučuttih stolah, kumpani oli täynnä makijaisie. Etnokulttuurikeškukšešša toimitah karjalan kielen kurššit aikuhisie varoin, harjottelou rahvahan Hete-folkloorikollektiivi, lapšilla pietäh karjalan folkloorin ta kielen kurššija. Šen lisäkši meinatah alottua kotišeutu- ta karjalan rahvahan istorijan tuntija, šekä muasteri-oppija. Myö toivomma, jotta meijän Hete-etnokulttuurikeškuš tulou paikakši, missä aina rupieu kuulumah karjalaini pakina.