Opi iče ta opašša muita

Šuurta huomijuo keškukšešša kiinnitetäh ikäihmisih. Jo vuuvven ajan Kalevalan keškuškirjašton tiloissa keräyvytäh eläkeläiset, kumpaset vietetäh aikua hyövyn kera - toko aškarellah tahi opitah carving-taituo (vihannekšien ta hetelmien kuvijoleikkuamista), šekä kašvimuahoijon erikoisuukšie (mitein hoitua omua kašvimuata, mitein kašvattua kukkie ta vihannekšie). – Tiälä on ylen mukava viettyä aikua, tiälä voimma tavata, paissa ta vielä opimma kaikenmoista hyvyöllistä, šuamma äijän uutta tietuo, kerto eläkeläini L’ubov’ Kutavkina. Tämmöset tapuamiset ollah erikoisen šuosittuja talven aikana, konša eläkeläisillä on äijän vapuata aikua. Harjotukšie pitäy keškukšen ruataja Žanna Bil’. – Fazenda-kurššin harjotukšilla meilä on enemmän teorijua. Tutkimma kirjoja, kaččelemma kuvija, keškuštelemma, vaihamma kokemušta. Kešällä eläkeläiset hivotah šuatuja taitoja omilla pihoilla, hoijetah kašvimaitah, kertou Žanna. – Onnakko tulevaisuuvvešša meinuamma oštua keškukšeh kašvihuonehet ta rupiemma kašvattamah niissä erilaisie vihannekšie. Tahomma, jotta täh työh yhyttäis keškukšen lapšetki, jotta hyö aikuhisien rinnalla opittais hoitamah kašvimuata. Keškukšen kehittämä uuši projekti starttasi viime šajekuušša. Šen nimi on Luova Gimnasija. Projektin enšimmäisissä harjotukšissa ošallistujat opittih laittamah kaikenlaisie talvišäilykkehie, šuolattih kaalie ta sriäpittih. Opetukšeh keräyty eri-ikähisie, kuin vanhempua rahvašta, šamoin keški-ikäsie ta nuorie. Pimiekuušša kuvontamuasterit opetettih Gimnasijan opaštujie kutomah korija. Projekti jatkuu šulakuuh šuate ta ieššä on vielä hyvin äijän mukavua.