Oma Mua

Ainehistoja livvinkarjalan murtehella

Hyvyä Uutta Vuotta Jyškyjärveltä!

Jyškyjärviläiset Sergei, Irina ta Var’a Kolmačovit vuotetah Uutta vuotta T’opa-koira šylissä // Kirjuttajat: Valentina Tarasova

Naiset piiruššettih kakši plakattie, yksi venäjäkši, toini karjalakši ta niijen avulla onniteltih rahvašta Uuvvella vuuvvella. Paikalliset eläjät mielihyvällä liityttih aktijoh, otettih plakatit käsih ta muhittih kamerah. Aktijo alko Jyškyjärveššä 31. talvikuuta 2017 ta jatku koko uuvvenvuuvven loman ajan. Yhet onniteltih Jyškyjärvie korissetun kuušen tauštalla, toiset – pruasniekkastolašša. Ken istuu plakatin kera mouttorikelkašša, ken lumikinokšešša. Valentina Tarasovan šivulla Vkontakte-sosialiverkoštošša ”Hyvyä Uutta Vuotta! Jyškyjärvi”-al’pomissa on 150 valokuvua.

– Konša mie laitoin internettih enšimmäisie kuvie onnittelujen kera, heti šain äijän hyvie vaštakaikuja, Valentina Tarasova šano. – Ihmiset, kellä on juuret Jyškyjärveššä tahi ket on käyty meijän kyläššä, ruvettih onnittelomah Jyškyjärvie ta työntämäh miula kuvie šamanmoisien plakattijen kera. Näin miun al’pomissa on valokuvie Kalevalašta, Kemistä, Segežašta, Kontupohjašta, Koštamukšešta, Petroskoista, Moskovašta, Piiteristä, Šuomen Imatrašta ta Sotkamošta.

Lisyä valokuvie šuau kaččuo kylän joukošša Vkontaktessa: https://vk.com/juskozero

 

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *