Oma Mua

Ainehistoja livvinkarjalan murtehella

Onežskaja maska veti lopputulokšet

Kanšallisen teatterin näyttelijä Julija Kuikka šai palkinnon Paraš naisšivurooli -nominatijošša Viian ta Eevan rooliloista Kun on tunteet -näytelmäššä. // Kirjuttajat: Sergei Judin, Respublika-tietotoimisto

Tilaisuon järještäjinä oltih Karjalan Kulttuuriministerijö ta teatteriruatajien liitto. Perintehen mukah palkintoseremonija piettih Karjalan Kanšallisešša teatterissa. Seremonija oli šuunniteltu pityä Teatteripäivänä, 27. keväkuuta, onnakko Kemerovon tragedijan takie pito oli šiirretty šulakuun alkuh. Tämänkertasešta Onežskaja maska -palkintoseremonijašta tuli fantastini teatterišou šuositun Adamsien pereh -musiikkinäytelmän tyylissä.

Arvoštelijakunnalla, kumpaseh kuuluttih Petroskoin ta Piiterin tunnetut näyttelijät, kriitikot, teatterin ta taitehen tutkijat, ei ollun helppo valita parahat. Vet viime kautena oli äijän onnistunuita teatteriroolija.

Paraš naisrooli -nominatijošša voitti Musiikkiteatterin näyttelijä Natalja Landovskaja. Iolannan rooli šamannimiseššä näytelmäššä toi naisella voiton.

Palkintoehokkahien joukošša oli Karjalan Kanšallisen teatterin artistojaki. Näin Kanšallisen teatterin näyttelijä Julija Kuikka šai palkinnon Paraš naisšivurooli -nominatijošša. A teatterin iänityšohjuaja Oleg Godarev šai diplomin Uškollisuošta teatterih -nominatijošša.

Paraš miešrooli-nominatijon voittajakši tuli Andrei Dežonov, kumpaista paremmin tunnetah Kanšallisen teatterin ohjuajana. Näytelmäššä “Karamboli keškiyön jälkeh” hiän oikein vaikuttavašti esitti Stalinin roolin, mistä šaiki anšijoitun teatteripalkinnon.

Valitettavašti V’ačeslav Pol’akovin Ihmehšauvan -lapšiennäytelmäššä esiintynyt Kanšallisen teatterin näyttelijäkunta jäi tällä kertua palkinnotta. Pitäy šanuo, jotta näyttelijät on jo valmissettu uuši spektakli Aleksandr Puškinin starinan mukah papista ta šen Balda-kasakašta. Näytelmän ohjuajana on niise V’ačeslav Pol’akov.

Karjalan Kanšallisešša teatterissa 2. šulakuuta oli pietty vielä yksi tapahtuma. Rakennukšen toisen kerrokšen aulašša oli avattu valokuvanäyttely, missä on esitetty Petroskoin Valokuvaušakatemija-liiton jäšenien uušie töitä. Näyttely toimiu 20. šulakuuta šuaten.

 

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *