Oma Mua

Ainehistoja livvinkarjalan murtehella

Pisara kuččuu mukavah matkah

Pisara-matkalaini on toini kirja Nina Arhipovan luomuškukkarošša. Pari vuotta takaperin näki päivänvalon hänen enšimmäini lapšien runokirja nimeltäh ”Vuuvven lippahaini”. // Kirjuttajat: Olga Melentjeva

Uuvven kirjan piähahmo, pikku vesipisara kuččuu pienie lukijie mukavah šeikkailumatkah. Pisara-matkalaini -kirja on tarkotettu ennein kaikkie lapšilla, kumpaset opaššutah karjalan kieltä kouluissa. Kertomukšen kirjuttaja Nina Arhipova toivou, jotta kirja tulou hyväkši avukši karjalan kielen opaštajilla. Šitä voit käyttyä kuin kotilukuna šamoin ni pakinatuntiloilla. Ammatiltah alkeisluokkien ta muantiijon opaštaja Nina Arhipova oli monta vuotta ruatan Jyškyjärven koulušša. Nina Nikolajevnalla on šuurta kokemušta karjalan kielen opaššušalallaki ta hiän hyvin tietäy, jotta karjalankielistä lukomista varšinki lapšilla varoin on vähän:

– Šilloin kun rupesin opaštamah karjalan kieltä koulušša, aina piti ičen mitänih kekšie. Kekšin runoja ta pienie kertomukšie, jotta tuntiloilla voisima harjotella lapšien kera lukomista.

Pensijalla piäštyön Nina Arhipova jatko kirjuttamista karjalan kielellä. Vuotena 2016 näki päivänvalon hänen enšimmäini Vuuvven lippahaini -kirja, kumpaseh oli kovotu lapšienrunoja.

Vaštailmeštynyt ”Pisara-matkalaini” on Nina Arhipovan toini kirja.

Paičči karjalan kielen oppimista ta uutta šanaštuo opaštuja šuau šiitä lisyä tietuo luonnošta ta luonnonlakiloista. Utelijan pisaran šeurašša pienet lukijat piäššäh tutkimah ympäristyö ta erilaisie luonnonilmijöitä. Lisäkši kirjan lopušta löytyy mukavie tehtävie. Kuvija kirjah on luatin piiruštaja Tamara Katogarova.

”Pisara-matkalaini” on painettu Karjalan Rahvahan Liiton projektin mukah Karjalan Šivissyššeuran rahatuvella. Oša kirjan painokšešta on tarkotuš jakua Karjalan kouluih, kumpasissa opaššetah karjalan kieltä. Lisyä tietuo tel. 780510 tahi omamua@mail.ru

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *