Oma Mua

Ainehistoja livvinkarjalan murtehella

Giperborejan pohjoistuuli puhalti Karjalah

Perintehen mukah tuiskukuušša Petroskoin rantakavulla kašvau lumi- ta jiälinna. Giperboreja-festivalin rajoissa puolešša netälissä muasterien Karjalašta, Venäjän eri puolilta ta ulkomailta piti luuvva rantakavulla erilaisie veššokšie jiäpalaoista ta lumik // Kirjuttajat: Kuva: vk.com/ptz_mo

Festivalin tapahtumat alettih pakkaiskuun kešellä tašavallan lapšien lumiveššokšien Giperborejan talvistarinoja -kilpailulla. Šiih otettih ošua Karjalan päiväkotien kašvatit ta koululaiset.

Perintehen mukah tuiskukuušša Petroskoin rantakavulla kašvau lumi- ta jiälinna, missä voit nähä ihmehellisie olentoja ta eläimie, starinamaisie šankarija ta kummallisie rakentehie. Kanšainvälini lumi- ta jiäveššoškilpailu on Giperboreja-talvipruasniekan keškisin tapahtuma.

Tänä vuotena kilpailuh oli ilmottautun muasterija Petroskoista, Aunukšešta, Kontupohjašta, Šuojärveštä, Lahenpohjašta, Piiteristä, Moskovašta, Novgorodin, Vologdan, Moskovan ta Murmanskin alovehilta, Udmurtijašta, Permin šeuvulta, Valko-Venäjältä ta Šuomešta. Festivalin rajoissa puolešša netälissä muasterien piti luuvva rantakavulla erilaisie lumi- ta jiäveššokšie kymmeneštä šuurešta jiäpalašta, kymmeneštä šuurešta ta kymmeneštä pieneštä lumikuutujošta.

Veššokšet oli omissettu eri teemoilla. Esimerkiksi, joukko Kontupohjašta luati lumikuutijošta viime vuotena palanuon Kontupohjan Uspenjan kirikön mallikuvan. A šentäh kun tämä vuosi on omissettu “Kalevalan” 170-vuotispäivällä, niin monta veššošta kuvattih eepossan šankarija – Väinämöistä, Ainuo, Vipuista ta muita.

Šuovattana arvoštelijakunta ilmotti kilpailun tulokšet ta voittajat. Pieni lumiveššoš nominatijošša voitti petroskoilaisien muasterien Ihmehellini muajilma -veššoš. Šuurikokosista lumiveššokšista voittajiksi oli valittu muasterijoukko Novgorodista ta heijän Tašapaino-veššoš. Jiäveššoškilpailušša enšimmäisellä šijalla piäsi šuomelaisien ta permiläisien yhteistyön tuloš – Rajan takana -veššoš.

Festivalin piäpäivänä kaupunkilaisilla oli järješšetty šuuri mukava ohjelma, kumpaseh kuulu hyvin äijän huvi-, urheilu- ta musiikkitapahtumua. Šuovatan pruasniekkaohjelma alko huomenekšella Onegajärven ahven -talvikalaššuškilpailušta. Šamoin järvellä oli järješšetty polkupyörä- ta juokšukilpailuja. Oli kaikenmoisie perehkilpailuja, jarmankkoja, hyvänluajinta-aktijoja. Petroskoin firmat esitettih omie tuottehie, huvitettih ihmisie ta juattih lahjoja. Pitopaikalla rantakavulla vierahie kostitettih Giperborejan karpaloglögillä.

Juhlapäivän aikana šiä muuttu monta kertua, ka petroskolaiset ta kaupunkin vierahat šiänvaihtelušta huolimatta piettih iluo, savotittih piirileikkie ta tanššittih, kačeltih veššokšie ta yhyttih erilaisih talvihuviloih, otettih valokuvie ta vuotettih pruasniekan ilotulitušta, kumpani tänä vuotena oli oikein kaunis.

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *