Oma Mua

Ainehistoja livvinkarjalan murtehella

Kantele-GO!-projekti piäsi rattahilla

Šuomelaiset ta karjalaiset staraijah monipuolistua musiikkie kantelie varoin // Kirjuttajat: Kuva Kantele-yhtyvehen nettišivulta

Tuiskukuun alušša Kantele-talošša piettih kanšainvälisen kulttuuriprojektin “Goes Global! Ground Zero” (lyhyöšti “Kantele-GO!”) partn’orien tapuamini. Rajan ylittäjän yhteistyön uuvven projektin tarkotukšena on popularisoija nykymuajilmašša kannel-šoitinta. Projekti alko tämän vuuvven pakkaiskuušša ta keštäy elokuuh 2021 šuaten.

Kantele-GO!-projektin piäpartn’orina on Karjalan laulun ta tanššin Kantele-yhtyveh. Toisina partn’oriloina ollah Priäžän piirin kanšallini taitehkoulu, Joenšuun Itä-Šuomen yliopisto ta Kuhmon Runolaulu-Akatemija.

– Kannel ei ole yksistäh karjalaisien ta šuomelaisien musiikkisimvoli, še on šamoin šemmoni muoto, mi muovoštau kanšallista identitettie. Valitettavašti, nykyihmisen elämäššä šillä šoittimella on liijan vähän tilua. Myö tahomma, jotta kantelešta šuatais tietyä koko muajilmašša, jotta šen kielet heliešti ta varmašti kuuluttais joka paikašta. Kantele-GO!-projektin rajoissa myö kerromma ihmisillä kantelešta, kekšimmä uušie šävelmie, esitämmä uušie šoittokeinoja, kerto projektin johtaja Ol’ga Vlasova.

Šamoin partn’orien tapuamiseh otettih ošua Kantele-yhtyvehen johtajan virkua toimittaja Tatjana Temniševa, Priäžän piirin taitehkoulun piälikkö Larisa Prokopenkova, Itä-Šuomen yliopiston professori Pekka Suutari. Runolaulu-Akatemijan johtaja, tunnettu runolaulaja Pekka Huttu-Hiltunen niise šai šeuruššella kollegojen kera on-line videoyhteykšen avulla. Partn’orijärještöjen etuštajat paistih projektin šuunnitelmista, järješšyš- ta raha-aseista.

Projektin rajoissa Karjalašša ta Šuomešša vietetäh nellä muasteri-kurššie kantelen opaštajilla, kolme musiikkipajua ammattimuusikoilla, kakši kantelen šoitolla omissettuo nuorisoforumie šekä tunnettujen musikanttien vierailuesitykšie.

Kantele-GO!-projektie toteutetah KT:n kulttuuriministerijön kannatukšella Venäjän ta Europan neuvošton rajan ylittäjän yhteistyön Karelija-ohjelman rajoissa.

 

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *