Oma Mua

Ainehistoja livvinkarjalan murtehella

Jätelajittelun ohjelma jatkuu

Petroskoissa jatkuu jätelajittelun ohjelma. Nykyjäh voit antua kierrätykšeh ei ainuoštah muovipulloja, ka i polipropilenišäilytyšašteita. Niih kuulutah maijonesišankot, jogurtti- ta kermastokanat, šampunipulloset, pikaruokapakkaukšet šekä toiset šuuret ta pienet esinehet, kumpasissa on 5-PP-merkki. Kaupunkinhalličukšen lehistöpalvelun tietojen mukah, petroskoilaiset šuahah jättyä luveteltuja esinehie jätepaperilla tarkotettuih luatikkoih.

Šiännöt ollah helpot: kerättyjä polipropilenišäilytyšašteita pitäy panna pušših, šituo še ta kirjuttua, jotta šiinä on “5-PP”.

Muovikeryämisen järještäjän Kalipso-yhtijön ruatajat muissutetah ihmisillä, jotta šäilytyšašteita pitäy tuuvva puhtahina, ilman ruuvvan jiännökšie, muiten niitä piluau homeh. Polipropileni pitäy panna šivottuh pušših, jotta šitä ois helpompi lajitella. Šamoin pitäy muistua, jotta luatikon kolo ei ole levie. Voit olla, šuurikokoni pušši šiih ei šovi.

Još šiun kaupunkinošašša ei ole jätepaperiluatikkoja, voit löytyä niijen atressija ta toisie lisätietoja yhtijön vk.com/kalipsokarelia -šivulta VK-verkošša. 

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *