Oma Mua

Ainehistoja livvinkarjalan murtehella

Puatanen kulttuurie tutukši

Elokuun 24. päivänä Karhumäješšä piettih Tašavallan päivyä. Juhlašša Puatanen kylyä esitti Seesjärven Savitskilla nimetyn rahvahankuoron vokaliryhmä (ohjuaja Natalja Kondrojeva) šekä Seesjärvi-etnokulttuurikeškukšen aktivistit johtajan Raisa Bogdanovan kera.

Folklorikentällä Seesjärven rahvahankuoron vokaliryhmä laulo kaččojilla karjalaisie lauluja ta näytti karjalaisie kisoja, kumpasih juhlaväki mielelläh otti ošua. Pahah šiäh kaččomatta Folklorikentällä onnistu luuvva iloista ta juhlallista ilmapiirie. Šiinä Seesjärven rahvahankuoron vokaliryhmyä autto Karhumäjen Karjalan helmi -folkloriryhmä (ohjuaja Jelena Ol’šakova) ta šen haitarinšoittaja Nikolai Ol’šakov, kumpani šoitti molommalla kollektiivilla.

Seesjärven rahvahankuoron vokaliryhmän artistoilla unohtumattomakši tapahtumakši tuli esiintymini Tašavallan päivän piälavalla. Kollektiivi enšimmäistä kertua laulo uušissa pukuloissa, mit oli ommeltu piätäkauten Tašavallan päiväkši. Enši vuotena Karjalan tašavalta rupieu juhlimah 100-merkkipäivyäh, a kuoro täyttäy 85 vuotta.

Seesjärvi-etnokulttuurikeškuš enšimmäistä kertua ošallistu niin mahtavah toimenpitoh. Muasteri-opin aikana Puatanen emännät opaššettih kaikkie halukkahie paistamah karjalaisie sriäpnöjä. Passipo Jaskevič Irinalla šankiloista, Kul’čitskaja-Pašukova Nataljalla kalitoista, Luikina Galinalla ta Antonova Lidalla šulččinoista – muasteri-oppi onnistu ta kiinnošti monie ihmisie.

Vierahie kummaššutti etnokulttuurikeškukšen ruatajien hyvä karjalan kielen taito. Suali, ka kenkänä kaččojista ei tietän karjalan kieltä riittäväšti, jotta arvata karjalaini arvautuš ta šuaha šiitä ilmani šulččina.

Šamoin vierahie miellytettih Puatanen käsityömuasterien esinehet pruasniekan tunnukšen kera. A jokahini lapši šai lahjakši liimapaperin šemmosen tunnukšen kera. Lapšilla meijän puvut, sriäpnät ta kieli oltih tovellisena eksotiikkana. Himottau toivuo, jotta meijän onnistuu šäilyttyä karjalaista kulttuurie tulijalla šukupolvella!

 

Raisa Bogdanova, Puatane

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *