Oma Mua

Ainehistoja livvinkarjalan murtehella

Eepossan epopeja

Tamara Jufan eskiisien mukah ommeltu puku šekä toiset esinehet balettitanššijan Natalja Gal’tsinan keryäntähiseštä. // Kirjuttajat: Irina Zaitseva

Näyttelyn avajaisissa musejon johtaja Mihail Gol’denberg korošti:

– Tämä vuosi on kuin Teatterin, niin ni “Kalevalan” vuosi. Teatteri on poliittisen, yhteiskunnallisen ta kultuurielämän tärkie oša, a “Kalevala” on innon loputoin lähte. Näyttelyššä on esitetty taijon eri lajija: teatteri, baletti, ooppera, elokuva, drama, a eepossa yhistäy kaikkie niitä. “Kalevalan” muuttamini näytännökši on šuuro ruato ta šamah aikah še antau rajattomie mahollisukšie luomistyöllä, vet jokahini näköy eepossua omalla tavalla.

Mihail Leonidovič kiitti KT:n Musiikkiteatterie, Karjalan Kašallista teatterie šekä Kuklateatterie, kumpaset annettih näyttelyö varoin esinehie omista varaštoista: näytelmien valokuvie, teatteripukujen ta lavaššukšien eskiisija, kukloja, pukuja, dokumenttija ta videomaterialija. Lisäkši, näyttelyššä on esitetty vehkehie näytelmien ošallistujien yksityiskeryäntähisistä. Tärkein niistä on Tamara Jufan eskiisien mukah ommeltu puku, kumpasen omistajana on balettitanššija Natalja Gal’tsina. Hiän esitti kaikki naisošat Šampo-baletissa.

Karjalan teatterit monta kertua kiännyttih Kalevala-eepossan puoleh. Enšimmäini eepossan ahieni näytelmä ilmešty vuotena 1935. Še oli Aleksis Kiven kirjuttama Kullervo-näytelmä. Šiitä ilmešty muitaki näytelmie, kumpasissa ohjuajat ta artistat näytettih omua neruo.

Näyttelyn avajaisissa kirkkahimmakši ta voimakkahimmakši šanottih 1974 vuotena Kurt Nuotion ohjuamua Kalevala-näytelmyä Karjalan Kanšallisešša teatterissa. Toimenpivošša kunnivoiteltih šen ošan ottajie Pekka Mikšijevie ta Jelena Kornilovua.

– Miula oli ajatuš antua näyttelyllä Eepossan epopeja -nimen, vet’ “Kalevala” ta šen antama into ollah ikuhiset. Pitäy kiäntyö niijen puoleh ei ainuoštah merkkipäivinä, on varma Mihail Goldenberg.

Eepossa. Teatteri. Aika -näyttelyh voit tuttavuštuo 1. kevätkuuta šuaten. Šen rajoissa järješšetäh eri luventoja ta kokoukšie.

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *