Oma Mua

Ainehistoja livvinkarjalan murtehella

Suarnua-vuarnua

Vieljärveläine “Tähkäine” ozutti Kodine-spektaklin. Tytit da dekoratsiet sih niškoi vieljärveläzet azuttih iče. Julija Jegorova, Ivan Jegorov da Anastasija Nesterova oldih sit ruavos. // Kirjuttajat: Jelena Ruppijeva

Karjalaine suarnu -festivuali tuaste keräi nuordu artistua Karjalan eri čuppulois. Festivuali piettih mennyt suovattan, 16. kylmykuudu. Jessol’čat, priäžäläzet, vieljärveläzet, jyškyjärveläzet, petroskoilazet nuoret artistat tuldih ozuttamah omua neruo Priäžäh.

Enämbi kaikkie vikse oli petroskoilastu da priäžälästy. Petroskoilpäi Priäžäh tuli kolme joukkuo lastu – kaksi suomelas-ugrilazes školaspäi da yksi Marjaine-päivykoispäi. Priäžäläzii oli kaksi suurdu joukkuo: školan da Ukonkuari-päivykoin lapset.   

Kaikkiedah “Karjalazes suarnas” saimmo kaččuo kaheksa ozutelmua karjalan kielel. Niidy ozutettih pienet päivykodiloin kazvatit dai suurembat školien opastujat. Enimytteh kuului liygii, vai yksi ainavo jyškyjärveläzien spektakli oli vienankarjalakse.

Laval toiči oli kogonaine joukko lastu, toiči spektakliloi lapset ozutettih kahtei libo yksinäh. Lavale kahtei tuldih suomelas-ugrilazen školan kymmenenden kluasan opastui Anastasija Jakovleva da seiččemenden kluasan opastui F’odor Ovčinnikov. Hyö ozutettih ozutelman “Kalevalan” Ilmarizen runon mugah. Sen samazen školan nelländen kluasan opastui Aleksei Ognev yksinäh ozutti Vit’a-brihaččustu Zinaida Dubininan kerdomuksespäi “Nelländele”. Brihačču kaunehesti ozutti da sanoi kaiken kerdomuksen.

Yhtet lapset nareko školis da päivykodilois omien opastajienke valmistutah Karjalaine suarnu -festivualih. Toizil ollah jo omat teatrat. Vieljärveläine tyttiteatru “Tähkäine” on jo kuulužu. Teatru ruadau jo nellätty vuottu, tulien 2020 vuon täyttäy viizi vuottu. Täs aijas “Tähkäine” on valmistannuh kolme ozutelmua karjalan kielel: “Kirjavu kanaine”, “Jänöin kyynälet” da “Kodine”. Tänävuon “Tähkäine” kävyi tazavallan kuulužah Kuklantida-festivualih da oli sit ainavo, ken ozutti spektaklin karjalakse...

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *