Oma Mua

Ainehistoja livvinkarjalan murtehella

Tosi karjalaisie iänijä

Juhlailta alko karjalankieliseštä Samovuara-näytelmäštä Juakko Rugojevin kertomukšen mukah. // Kirjuttajat: Aleksandra Lesonen

Mistä alkau luova kollektiivi? Ka tottaš šen peruštamisešta. Niin, šykyšyllä 1984 Koštamukšešša ilmešty karjalaini Hete-folkloriryhmä. Kollektiivin alkuhpanijina oltih kirjailija Juakko Rugojev, Vatasien pariskunta, kaupunkin piämieš Gennadi Lazarev ta omašta kulttuurista kiinnoštunuot karjalaiset.

Monivuotisen istorijan aikana “Hettien” artistat laulettih hyvin äijän lauluja, piettih monilukusie konserttija, pruasniekkoja, festivalija, näytelmöjä, käytih konserttimatoilla Venäjyä myöten ta ulkomaillaki.

Juhlailta alko karjalankieliseštä Samovuara-näytelmäštä Juakko Rugojevin kertomukšen mukah. Piärooliloissa esiinnyttih Hete-ryhmän ošanottajat. Šiitä päivänšakarija onniteltih hyvät yštävät: kanšalaisjärještöjen jäšenet ta folkloriryhmien artistat Koštamukšešta ta Vuokkiniemeštä, paikallisen hallinnon etuštajat, vierahat Šuomešta.

“Hete” on Koštamukšen šamanikäini. Ajan kuluos’s’a ryhmäššä muututtih šoittajat, laulajat, ohjuajat. Nyt ryhmyä ohjuau muusikko Artur Jefremov. Ka muuttumattomana ryhmäššä jiäy ainutluatuini, tovellini ta niin kaunis laulutapa. Artistat ahkerašti šäilytetäh karjalaisien laulutapua ta kulttuuriperintehie. Kiinnoštunuot ta taitajat ihmiset luajitah kaikkie rakkahuolla omah kotimuah.

Juhlapivon aikana šai kuulla äijän hyvie šanoja. Esimerkiksi, Hete-ryhmän monivuotini ohjuaja, Viena-kulttuurišeuran jäšen Ol’ga Maksimova kerto:

– Ryhmä tuli miula toisekši perehekši, missä mie šain čukeltua omah kieleh, kulttuurih ta perintehih. Hete-ryhmän kaikilla artistoilla mie toivotan tervehyttä, rakkahutta ta lykkyö. Anna meijän ryhmä tuou iluo rahvahalla Koštamukšešša ta Vienašša vielä monie vuosie!

 

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *