Oma Mua

Ainehistoja livvinkarjalan murtehella

“Kulkusien” eepossan starina

Kohtauš Kalevalan suarnu -spektaklista // Kirjuttajat: Natalja Zadorina

Kulkuset-yhtyvehen näytelmä oli omissettu Kalevala-eepossan vuuvvella ta Karjalan tašavallan tulijalla 100-merkkivuuvvella.

Kirkkahašša ta mahtavašša esitykšeššä oli äijän tanššija, musiikkie, lapšie kaunehissa pukuloissa, lauluja ta runoja.

– Myö olemma valmistan jo monta karjalaista starinua. Tänä vuotena piättimä, jotta pitäis valmistua ni eepossalla omissettu esityš. Še on musiikkispektakli karjalan kielen livvin murtehella šekä venäjän kielellä. Nyt meilä on enemmän venäjänkielisie kaččojie ta pitäy, jotta hyö ymmärrettäis mistä on eepossa šekä kuultais ni karjalaista pakinua, kerto Kulkuset-yhtyvhen johtaja Natalja Kaširina.

Näytelmän tarkotukšena oli tuttavuštua kaččojie “Kalevalah”.

– “Kalevala” on šuuri ta vaikie tevoš. Spektaklih myö ottima šemmosie pätkie, kumpasie lapšilla olis helpompi ymmärtyä. “Kulkuset” on tanššiyhtyveh, šentäh näytelmäh valiččima šemmosie pätkie, kumpasih šais lisätä tanššija. Meijän spektakli muissuttau starinua ta še on tarkotettu lapšilla, šelitti käsikirjutukšen luatija Julija Kalinina.

Kalevalan suarnu -spektaklih otettih ošua yhtyvehen kaikki ryhmät šekä lapšien vanhemmat ta luomistalon ruatajat, kaikkieštäh yli 80 ihmistä. Piärooliloissa on šeiččemen henkie, vielä kolme luvetah runoja, kaikki toiset otetah ošua tanššiloih, kumpasie on näytelmän kaikissa ošissa, šekä joukkokappalehih.

Enši-illan jälkeh näytelmän luatijat šuunnitellah ošallištuo šen kera lapšien teatterifestivaaliloissa.

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *