Oma Mua

Ainehistoja livvinkarjalan murtehella

Vaštavukšie Piäjärveššä

Kohtauš Šeiččemen stauččua, šeiččemen lusikkua -näytelmäštä Kalevalan kulttuuritalošša. Lavalla Nadežda Hirjanova (vaš.) ta Nina Aleksejeva. // Kirjuttajat: Kuva: vk.com/novkalev

Kalevalan rahvahanteatterin vaštavukšet Piäjärven eläjien kera tultih jo perintehellisiksi. Pakkaiskuun lopušša esityšryhmä Valentina Saburovan joholla tuaš ilahutti meitä omalla Šeiččemen stauččua, šeiččemen lusikkua -näytelmällä karjalan kielellä. Liikuttava spektakli oli omissettu Šuuren voiton 75-vuotispäivällä.

Piäjärven kulttuuritaloh keräyty kuin paikallisie eläjie, kumpasien kešen oli ni venäläisie, niin ni kaččojie Kiestinkistä, Sohjanankošešta ta Kananaisešta. Kaikin mielelläh kačottih näytelmyä ta räpytettih artistoilla.

Vielä kiinoštavampi oli Valentina Kirillovnan laululevyn presentatijo. Naini kerto, kuin šynnyttih laulut, a artistat taitavašti niitä laulettih. Laulujen kešen oli tuttuja ta uušieki tevokšie. Ne kerrotah meijan elämäštä, luonnošta, omašta kyläšta, ta kyllä hyvin paššatais joka lauluryhmän ohjelmistoh.

Piäjärven karjalaisšeurojen jäšenet otettih vaštah vierahie. Myö kostittima artistoja ta kaččojie toisista kylistä čäijyllä piirakkojen kera. Šamoin myö esittimä vierahilla Karjalaisen pirtin tiloja, missä hyö šuatih tuttavuštuo meijän toimintah ta oštua kaunehie mattoja, kumpasie kuvotah Piäjärven naiset kankašpuilla.

Šanomma šuuret passipot artistoilla, eniten Valentina Saburovalla, ta kučumma heitä toiččiki! Passipuo kulttuuritalon ruatajilla artistojen hyväštä vaštahotošta ta yhteistyöštä meijän kera.

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *