Oma Mua

Ainehistoja livvinkarjalan murtehella

Lapšien toivehkaupunki

Lapšet luajittih kokonaisen taikakavun kahen metrin korkeista pahvitaloista. // Kirjuttajat: Maikki Spitsina

Kešän enšimmäisenä päivänä Kirovin aukijo muuttu värikkähäkši lapšien kaupunkiksi, missä pienoset kilpailtih, opaššuttih piiruštamah, luatimah pahvitaloja ta noušomah ”kallivoja”.

Miun toivehen kaupunki -festivaalin tarkotukšena oli perehyttyä lapšie tervehen elämän tapoih, taitehelliseh, moraaliseh ta henkelliseh kulttuurih, šekä järještyä jokavuotisen tašavallan lapšien pruasniekan perinneh.

Päivän aikana lapšet ta heijän vanhemmat juhlapiirissä šuatih tuttavuštuo niih järještöih, kunne voipi tulla lapšen kera. Kulttuurijärještöjen etuštajat kerrottih omista kerhoista ta esitettih omie ohjelmie.

Tovellaki kokonaini lapšien kaupunki šijoutu pruasniekkapäivänä Kirovin aukijolla. Šiinä oli kaikkie, mitä lapšukaiset niin tykätäh ta toivotah: kaikenmoisie huvilaittehie, karusellija, mäkijä, hyppylaittehie ta tietyšti makijaisie. Pahah šiäh kaččomatta Miun toivehen kaupunki -festivaalih keräyty pienie petroskoilaisie ta heijän vanhempie, jotta ošallistuo pruasniekkaohjelmah.

Konša vihmu loppu, piälavalla alko lapšien musiikki- ta tanššikollektiivien konsertti. Šiih ošallissuttih Kantele-yhtyvehen nuorisostudijo, Žemčužinka-kollektiivi, Volšebni šag -tanššikoulun ryhmät.

Festivaalin yksi kirkkahimmista hetkistä oli Pienet kuret taivahašša -aktijo. Parissa tunnissa lapšet luajittih paperista pienie lintusie origamin tehniikašša. Šiitä kurkija šivottih ruškeih ilmapalloih ta konsertin aikana piäššettih taivahah. Še oli unohtumatoin hetki.

Pruasniekašša Karjalan tašavallan opaššušministeri Aleksandr Morozov korošti, jotta Petroskoin eläjillä onnistu rakentua toivehkaupunki.

Miun toivehen kaupunki -festivaali još ei toteuttan toivehie, niin varmašti toi äijän ilomieltä kuin lapšilla niin ni vanhemmilla. Himottais toivuo, jotta šiitä pivošta tulou hyvä perinneh.

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *