Oma Mua

Ainehistoja livvinkarjalan murtehella

Luovat ihmiset šuatih palkintoja

Tänä vuotena Juakko Rugojevin stipentin šai Valtijonyliopiston opaštuja Darja Korol’ova.

– Tällä pivolla myö lopetamma kulttuurivuuvven, kumpani oli pietty meijän tašavallašša. Karjalan Tašavallan piämiehen puolešta onnittelen kaikkie stipentin šuamisešta ta toivon uušie luomismäneššykšie, tervehti kaikkie piämiehen šijahini Valentina Ulič.
Valentina Ulič korošti, jotta Karjalan luovih liittoloih kuuluu yli 500 ihmistä. Še on šuuri ta arvovaltini voima, kumpani šäilyttäy ta kehittäy kulttuuriperintehie Karjalašša.
Kulttuuriministeri Jelena Bogdanova kerto kulttuurivuuvven tulokšista. Hänen šanojen mukah Karjalašša oli toteutettu äijän tärkeitä projektija. KT:n kulttuurilaitokšet šuatih uuvvet buššit, Musiikkiteatteri voitti 21 miljonin rupl’an grantin, Kanšallisešša kirjaštošša oli avattu uuši šali, monet kulttuurilaitokšet šuatih tukie ta rahatušta omih tarpehih.
Palkinnonšuajat koroššettih, jotta stipenti ei ole yksistäh rahatuki, še on heijän työn tunnuššuš kulttuurin alalla.
Juakko Rugojevin ta Robert Roždestvenskin stipentija myönnetäh vuuvvešta 1996 nuorilla nerokkahilla opaštujilla, kumpaset kirjutetah karjalan, vepšän ta šuomen kielellä. Tänä vuotena Juakko Rugojevin stipenti šai Valtijonyliopiston opaštuja Darja Korol’ova. Robert Roždestvenskin stipenti myönnetäh kirjuttajilla, kumpaset kirjutetah venäjän kielellä. Šen šai Anastasija Sofronova Petroskoin Valtijonyliopistošta.

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *