Oma Mua

Ainehistoja livvinkarjalan murtehella

Pos’olkan pohatta kulttuurielämä

Tänä vuotena Uhut-šeuran palkinto luovutettih artistalla Al’ona Kislitsinalla (oik.), kumpani korkietašosešti näytti nerojah ta näyttelijätaitojah Kalevalan kanšanteatterin viime näytelmissä.

Konserttih ošallistunuot Kalevalan kantelehenšoittajien yhtyveh, Lokka- ta Topotuhi -tanššikollektiivit, lapšien Tarina-folkloriryhmä, Veikko Pällisellä nimetty Kalevala-kuoro ta Kalevalan keškikoulun opaštujat lahjotettih kalevalalaisilla ta pos’olkan vierahilla äijän hyvyä mieltä. Lavalta kuulu karjalaisie lauluja ta runoja, ohjelmašša oli äijän tanššija ta piirileikkijä.

Konsertin lopušša luovutettih perintehellini jokavuotini palkinto näyttelijän taitehellisuošta, uškollisuošta näyttelijätaijolla, panokšešta karjalan kielen ta kulttuurin šäilyttämiseh. Tämän palkinnon peruštajana on Uhut-šeura-kanšalaisjärještö. Šitä myönnetäh Kalevalan kanšanteatterin artistalla, kumpani viime teatterikauven aikana erittäin hyvin esiinty spektakliloissa.

Tänä vuotena Uhut-šeuran palkinto luovutettih artistalla Al’ona Kislitsinalla, kumpani näytti omua näyttelijätaituo Kalevalan kanšanteatterin viime näytelmissä: Samovuara, Kukon lykky, Meijän kylän kummitukšet. Al’ona šai oman palkinnon Uhut-šeuran johtajan Valentina Kovalenkon käsistä. Šitä ennein tämä palkinto oli myönnetty kanšanteatterin artistoilla Vladimir Denisovilla, Staskoit’ Svetlanalla, Viktor Melentjevilla, Lilija Nikutjevalla ta toisilla näyttelijillä.

Kaččojat, kumpaset tultih konserttih, lämpimäšti tervehittih paikallisie omatoimisie artistoja. Pitäy mainita, jotta Kulttuuritalon toimehpivot aina kiinnoššetah kalevalalaisie ta kerätäh äijän innokkahie.

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *