Oma Mua

Ainehistoja livvinkarjalan murtehella

Onko ”Sommelon” ikä jo illašša?

Sommelo-festivalin Haikol’a-ošan konserttikenttänä ollah iče kylä, pelto, järven ranta… // Kirjuttajat: Nadežda Vasiljeva

Kakši toimehpituo – Tuttavat laulut ”Sommelon” ritmissä -konsertti Kalevalan kulttuuritalošša ta etnoillačču Kuitto-ravintolašša – järješšettih enšimmäisenä päivänä piirin keškukšešša. A šeuruavan päivän huomenekšen festivalin ošallistujat otettih vaštah Haikol’an Iänikäš kylä -pruasniekašša.

Sommelo-festivalin rajoissa esiinnyttih Asketics-embient-folk-jazztrio, muusikot Šuomešta ta Kalevalašta, Kulttuuritalon Tarina-, Lokka-, Kalevala -kollektiivit ta kantelistijen yhtyveh.

Matka Haikol’an kylän tuli jo hyväkši perintehekši Sommelo-festivalilla. Karjalaisen kirjailijan Ort’t’o Stepanovin kotimualla festivalin artistat esiinnytäh toini toisien ta kaččojien ieššä verekšeššä ilmašša taivašalla. Konserttikenttänä ollah iče kylä, pelto, järven ranta…

Onnakko musiikkifestivali, kumpani parahina vuosina keräsi konserttikentillä ei ainuoštah šuomelais-ugrilaisie artistoja, ka äšen esiintyjie Afrikašta ta Aasijašta, ošallistujien ta kaččojien mieleštä on vuosi vuuvvelta yhä lauhtunut ta kulkou omua ijäniltua kohti.

Voipi pitälti kiistyä, mi on aiheuttan šen, jotta aikoinah ylen popularini festivali on kavottamašša entistä mainehtah, – ollouko še rahan vain uušien idejojen puuteh, – ”Sommeluo” še ei auta. Miun mieleštä, šiinä on monta šyytä. Niijen luvušša on kreatiivisen nuorison puuteh festivalin järještäjien joukošša šekä liijan kaitaset muantietorajat (Kuhmo–Kalevala–Haikol’a), kumpasih Sommelo-festivali on pantu. 

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *