Oma Mua

Ainehistoja livvinkarjalan murtehella

Pakkaisukkojen sammitti

Pakkaisukkojen sammittih ošallistu Pakkaisukkoja, Lumineitosie, Santa Clausija šekä Petroskoin piälikkö Irina Mirošnik. // Kirjuttajat: Kuva otettu gubdaily.ru -saitilta

Yli kymmenen vuotta takaperin Petroskoissa ilmešty epävirallini Pakkaisukkojen puoluveh -luomisšeura. Šen jäšeninä ollah ne, ket Uuvven vuuvven uattona šuoriuvutah tarvittavah pukuh ta Pakkaisukon roolissa ošallissutah erilaisih uuvvenvuuvven ta Roštuon ohjelmih Karjalan eri kaupunkiloissa ta kylissä. Perintehen mukah, kaikki nämä toimenpivot aletah Petroskoin Kulttuuritalošša Pakkaisukkojen sammitilta.

Tämän vuuvven Pakkaisukkojen sammittih, kumpani piettih puolta kuukautta aikasemmin Uutta vuotta, keräyty 20 Pakkaisukkuo (monet omien Lumineitosien kera) šekä monieš kaupunkilaini Santa Clausi tonttu-apulaisien kera. Šanakši, Santa Clausit enšimmäistä kertua ošallissuttih sammitin ruatoh.

Tapuamiseh kučuttih ni Petroskoin piälikkö Irina Mirošnik. Kaupunkin johtaja kerto, kuin tašavallan piäkaupunki valmistautuu Uuteh vuoteh ta Roštuoh. Vuoroštah Pakkaisukot šaneltih, mimmosih uuvvenvuuvven ta Roštuon ohjelmih hyö otetah ošua tällä kertua. Petroskoissa šuurimmat uuvvenvuuvven toimenpivot järješšetäh Kirovin aukijolla šekä Drevl’anka-, Kukonmäki-, Kl’učevaja- ta Solomennoje -kaupunkin ošissa. Šamoin Pakkaisukot käyväh läsijien lapšien luo, kumpaset nyt ollah kaupunkin ta tašavallan pol’ničoissa.

Pakkaisukkojen sammitin lopušša kaikin tultih Karjalan piäkuušen luo Kirovin aukijolla ta yheššä šytytettih šillä erivärisie valoja. Šiitä Pakkaisukot kučuttih lapšie ta aikuhisie, ket oltih aukijolla, yhtehiseh piirileikkih.

Lisyä kommenti

Luokkaukšie, kanšallista pahantahtoisuutta šekä VF:n lakien vaštasien toimien kehotušta šisältäjät viestit poistetah šivuilta!

Kommentit: *
Šiun nimi: *